Accueil > Kwidagadura > Abacuraranzi > Sogo ati : «…umurwi utanga amanota muri Primusic ntuhengamye… »
Sogo ati : «…umurwi utanga amanota muri Primusic ntuhengamye… »
mardi 3 Nyakanga 2013
Steven Sogo, umwe mubagize umurwi utanga amanota mw’ihiganwa rya Primusic arahumuriza abantu bibaza ko uwo murwi udakora neza. Ivyo akaba abimenyesha inyuma y’imyidogo ya bamwe bamwe mu bahiganwa n’abandi bakurikirana ivyiryo higanwa ry’abaririmvyi.
- Steven Sogo
Nkuko uyu Steven Sogo yabivugiye mu giteramo cabaye mu ntara ya Gitega ku mpera z’iyi ndwi iheze , iyo abantu babonye umuririmvyi bari bakushigikiye arushijwe mw’ihiganwa imyidogo ntiyobura. Ivyo rero bagaca bavyegeka ku murwi utanga amanota. Bakagirako uwo murwi udakora neza, ko uwo murwi ufise aho uhengamiye.
- Umurwi utanga amanota muri Primusic
Kuri ivyo Steven Sogo yagize ati: “Mu vy’ukuri umurwi utanga amanota muri Primusic ntuhengamye, ntushobora guha amanota umuntu atayakwiye canke ngo uwo murwi wime amanota umuririmvyi w’umuhinga biboneka. Ndahumuriza rero abantu bose bafise impungenge nk’izo ko bakwiye kubireka kuko ibikorwa vyuwo murwi ntaho buhengamira, uwuzotsinda n’uwuzoba abikwiriye kandi arusha abandi”. Nkuko uyu muririmvyi yabandanije avuga, ntibishoboka ko abantu 5 bakumvikana guhengamira k’umuririmvyi uwariwe wese. Naho bamwe bovyiyumira, bose ntibovyemera guhengamira ku mururirimvyi.
Twokwibutsa ko umurwi utanga amanota ugizwe n’abahinga 5 mu vy’umuziki aribo: Buddy ari nawe arongoye uwo murwi, Alida, Arnaud Nganji, Steven Sogo n’umuhinyanyuzi Amiry Pro. Ihiganwa rya Primusic naryo rikaba rigeze mu gice ca ryo ca nyuma. Kw’igenekerezo rya 14 Nyakanga 2013 akaba ariho hazoba igice ca nyuma ciryo higanwa.
SENGUREBE Joel
