UA irashima ko ibiganiro bigiye gusubira gutangura

Ishirahamwe ry’Ubumwe bwa Afrika rirashima ko ibiganiro bihuza abarundi bgiye gusubira gutangura,inyuma y’amezi atanu bihagaze.

Mw’itangazo ry’ishirahamwe ry’Ubumwe bwa Afrika ryo kuri uno wa gatanu igenekerezo rya 25 Kigarama 2015,umukuru w’ishirahamwe ry’Ubumwe bwa Afrika Dr Nkosazana Dlamini Zuma, amenyesha ko abandanya gukurikiranira hafi ibibera mu Burundi n’utwigoro dufise intumbero yo gutora inyishu yihuta kandi mu mahoro y’ikibazo kiri mu Burundi.

Umukuru w’ishirahamwe ry’Ubumwe bwa Afrika ahamagarira impande zose zegwa n’ikibazo ca politike kiri mu Burundi gukorana neza n’umuhuza kandi zigashira imbere ineza y’igihugu n’abanyagihugu imbere y’ibindi vyose.

Dr Nkosazana Dlamini Zuma,yasubiye kwemeza ko ibiganiro bibaye mu muco kandi vyitabwe na bose,arivyo vyonyene bizotuma ingorane zihanze igihugu zihera.