Umugwi ujejwe amatora CENI wiyemeje gutegura amatora adahengamye mu mwaka w’2015

Kuri uyu wa kabiri igenekerezo rya 22 Nzero 2013 i bujumbura, umugwi ujejwe amatora CENI waragize inama n’abafasha mu matora. iyo nama yari iyo kumenyana no kuvugana ivyo bipfuza mu matora hamwe n’ico umwe wese yiyemeje.

Abaserukira Reta, abaserukira ibihugu vyabo, amashengero, n,abaserukira imigambwe n’amashirahamwe adaharanira inyungu za politique nibo bari bitavye iyo nama y’umugwi ujejwe amatora ceni wateguriye abawufasha mu matora. Uwurongoye uwo murwi Petero karaveri Ndayicariye mwijambo ryiwe yarashimye ico muntu wese yaterereye yongera asaba ko bokwongera kuyifasha kugirango itegure amatora ku mugaragaro no mu mwidegemvyo.

Ambassaderi Ndayicariye yarerekanye ko amatora ari ngirakamaro mu buzima bw’igihugu, amenyesha ko CENI ataco yokwishoboza yonyene idashigikiwe n’inzego zimwe zimwe z’igihugu. Ati « CENI izobandanya ivugana n’inzego muserukira isaba intererano zitandukanye. »

CENI yiyemeje guharura amafaranga yakoresheje mu matora yo mu mwaka w’2010. Nkuko umukuru wa CENI yabivuze ibibazo bimwe bimwe bikwiye kwicarirwa. Aha twovuga nk’ibibazo vy’ukuntu amatora azogenda : ibice 5 vy’amatora, ikiganiro co guhanahana ivyiyumviro ku bijanye n’ikoreshwa ry’ikarata imwe mumatora canke ko hokoreshwa amakarata menshi ,ugutunganya ivyegeranyo n’ibindi.

Akaba yabandanije amenyesha ko bipfuza ko abatanga uburyo bobutanga kare kugirango ceni itegure neza uko uburyo buzokora.