Accueil > Poritike > Umukuru w’igihugu yarakiriye mu biro iwe abagiye guserukira ibihugu vyabo mu (...)
Umukuru w’igihugu yarakiriye mu biro iwe abagiye guserukira ibihugu vyabo mu Burundi
samedi 19 Nzero 2013
Kuri uno wa gatanu igenekerezo ry’18 Nzero 2013, umukuru w’igihugu Petero Nkurunziza yarakiriye mu biro iwe abagiye guserukira ibihugu vyabo m’u Burundi.
Nkuko vyamenyeshejwe na Willy Nyamitwe icegera c’umuvugizi w’umukuru w’igihugu ngo abo bagiye guserukira ibihugu vyabo m’u Burundi bari baje bazanye amakete abagena muri ayo mabanga bongera bamumenyesha ubutumwa bwa bagenziwe mu bijanye n’imigenderanire hagati y’ibihugu vyabo n’igihugu c’u Burundi.
Kubwa Willy Nyamitwe, ngo abo bserukira ibihugun bakaba barashimye cane intambwe u Burundi bugezeko mu bijanye no gutsimbataza amahoro gushika n’aho mbere u Burundi bufasha mu bindi bihugu nka Somaliya,Sudani na Cote d’Ivoire.
Abo bagiye guserukira ibihugu vyabo m’u Burundi akaba ari Dawn M Liberi agiye guserukira reta zunze ubumwe za Amerika,intebe yiwe ikaba iri i Bujumbura,Balaynesh Zevada agiye guserukira Israel intebe yiwe ikaba iri i Addis-Abeba mu Ethiopie,Michael Mlynar aserukira igihugu ca Slovaquie intebe yiwe ikaba iri i Nairobi,Yaqoub Youssef Al-Sanad aserukira igihugu ca Koweit intebe yiwe iri i Nairobi,uwa nyuma akaba ari Luis Cuesta Civis agiye guserukira inoma ya Espagne intebe yiwe ikaba iri i Dar-es-Salaam mu gihugu ca Tanzaniya.
Joel Sengurebe
