Umutekano warongerejwe mu minsi iheza umwaka

Mu gihe umwaka wa 2012 uheze tukaba dutanguye umwaka wa 2013,reta y’UBurundi yarafashe ingingo zo gukomeza umutekano kugira muri ino minsi mikuru iheza umwaka umutekano uzobe uri ku rugero rushimishije.

Mu ntumbero yo guhimbaza iminsi mikuru iheza umwaka,reta y’UBurundi yarafashe ingingo zituma umutekano w’abanyagihugu udahungabana. Reta y’UBurundi ikaba isaba rero abo bose bategekanya guhimbaza iyo minsi mikuru bari hamwe ari benshi kubanza kubimenyesha abajejwe intwaro hamwe n’abajejwe umutekano.

Muri iyo ntumbero nyene umuziki n’intambo bibera ku mugaragaro bikaba bibujijwe inyuma y’isaha zine z’ijoro.Ku bijanye n’umutekano wo mw’ibarabara,igipolisi kikaba casabwe gukoresha ubuhinga bwa alcotest kugira bashobora kubona abagendesha imodoka banyoye inzoga.

Mu kurangiza reta ikaba imenyesha abanyagihugu ko mu gihe hokwaduka umuriro ko bohamagara ku nimero itariha 113, nayo mu gihe c’ubundi bugizi bwa nabi boterefona ku nimero 118.