Umwimbu w’icayi warongerekanye mu mwaka uheze w’2012

Ihinguriro ry’icayi mu Burundi OTB rirashima ingene umwimbu wagenze mu mwaka uheze. Mu mwaka w’2011 hari habonetse amatoni arenga ibihumbi 8, mu mwaka w’2012 naho habonetse amatoni arenga ibihumbi 9. N’amafaranga yinjira mu kigega ca Reta ngo yiyongereyeko ayarenga imiliaridi 10.

Ihinguriro ry’icayi mu Burundi OTB rimenyesha ko ryongereje umwimbu mu mwaka uheze w’2012. Umwimbu w’icayi ngo wavuye ku matoni arenga ibihumbi 8 mu mwaka w’2011 uja ku matoni arenga ibihumbi 9 mu mwaka uheze w’2012.

Mu kiganiro umuyobozi mukuru wa OTB Alexis Nzohabonimana yahaye abanmenyeshamakuru kuri uyu wa kane, yamenyesheje ko n’amafaranga jinjira mu kigega ca Reta avuye mu gitegwa c’icayi yiyongereyeko imiliaridi zirenga 10 z’amarundi. Nzohabonimana yavuze ko mu mwaka w’2011 hari habonetse amafaranga arenga gato imiliaridi 29 hanyuma mu mwaka uheze w’2012 ngo habonetse amafaranga arenga imiliaridi 39.

Ivyo ngo vyavuye kukwitanga kw’abarimyi bitayekoigiterwa c’icayi hamwe n’ihinguriro OTB ryatanze umwavu ukwiye.

Umuyobozi wa OTB yamenyesheje kandi ko n’umurimyi yahatoreye akoyokwe mukuronka agashirukabute. Umurimvyi wese w’icayi ngo yaronkejwe amafaranga 100 ku kilo kimwe, umuntu aharuye ibilo vyose yashoye vy’icayi umwaka wose ku mahinguriro yose ya OTB ari mu Burundi.

Naho biri uko, Alexis Nzohabonimana avuga ko ingorane zozo zitabuze muri ico gisata c’icayi. Avuga cane cane ingorane ziri mu bijanye n’amategeko agenga amashirahamwe ya Reta mu gutanga amasoko nk’iyo hakenewe kugurwa ibikoresho, umwavu wo gutabira icayi n’ibindi. Ngo kenshi na kenshi hari igihe hajamwo ka mwana wa mama canke ibiturire. Asaba ko ababijejwe bobihinyanyura hajamwo umuco.

Igiterwa c’icayi kigira kabiri mu biterwa njabukamazi havuye ikawa bizanira amafaranga y’agaciro u Burundi.