Accueil > Inkino > Intamba mu rugamba mu rukino rwo gusubiriza muri kenya
Intamba mu rugamba mu rukino rwo gusubiriza muri kenya
jeudi 3 Nzero 2013
Umurwi nserukiragihugu w’umupira w’amaguru Intamba mu rugamba w’abakinyi bakinira mu mirwi yo mu gihugu warafashe indege kuri uno wa gatatu uja mu gihugu ca Kenya mu rukino rwo gusubiriza inyuma y’urukino rwabereye IBujumbura ku kibuga citiriwe umuganwa Rudoviko Rwagasore.
Mu mpera z’indwi iheze nta nkino zo mu ciciro cambere zabaye haba mu gihugu hagati canke IBujumbura.Imvo nyamukuru akaba ari uko umurwi nserukiragihugu w’abakinyi bakinira mu mirwi yo mu gihugu bari mu myimenyerezo yo kwitegurira urukino rwo gusubiza ruzobera I Naïrobi mu gihugu ca Kenya ukaba uzotana mu mitwe n’umurwi Harambe Stars w’igihugu ca Kenya kuri uno w’Imana itariki 6 nzero 2013.
Nassim Lotfi umumenyereza w’umurwi nserukiragihugu akaba yamenyeshejeko abakinyi biwe bameze neza kandi ko biteguye neza guhangana n’umurwi Harambe Stars kuko ivyangombwa vyose biriho.
Twobibutsa ko m’urukino rwa mbere rwabereye IBujumbura ku kibuga citiriwe umuganwa Rudoviko Rwagasore umurwi nserukiragihugu Intamba mu Rugamba watahukanye amanota atatu utsinze umurwi Harambe Stars igitsindo kimwe k’ubusa,igitsindo cinjijwe n’umukinyi Christophe Nduwarugira batazira Lucio.
Mugisha Van Naris
