Umuririmvyi Beyoncé yaririmvye indirimbo ihayagiza igihugu ca America mu birori vyo kwimika Obama

Mugihe isinzi ry’abantu bari bakoranye mu birori vyo kwimika prezida Barack Obama ubugira kabiri mu mabanga yo kurongora leta zunze ubumwe za America ,umurirmvyi w’umunyamerikakazi Beyoncé yararirimvye neza cane indirimbo ihayagiza igihugu ca Amerika.

Uko umuririmvyi Beyoncé yasubiyemwo iyo ndirimbo vyarahimbaye cane prezida ,umukenyezi wiwe Michelle Obama,n’abari bakoraniye ngaho bose,kuko yaririmvye n’ijwi ryiza kandi n’icubahiro cinshi.Mbere n’abatari bake barashimye cane iryo jwi rya Beyoncé muri iyo ndirimbo,babicishije k’umuhora ngurukanabumenyi internet.

Ariko rero ibinyamakuru bimwe bimwe vyo muri Amerika no mu Bwongereza vyamaze kuvuga ko iyo ndirimbo yayiririmba asubiramwo ivyari kuri CD,ngo indirimbo zose zateguwe kuri uyo musi zari zafashwe ku ma CD imbere y’igihe, kugirango ntihagire ingorane ziza kuhaba bataziteguriye.

Ivyo ngo bakaba babivuga bisunze ivyavuzwe n’umuvugizi w’umugwi w’abaririmvyi ugizwe n’abasirikare bakorera mu mazi muri leta zunze ubumwe za America ( United States Marine Band). Kristin DUBois, ngo akaba yavuze ko Beyoncé yakoresheje CD yariyafatiyeko iyo ndirimbo ivyo bita «playback».