RDC: ONU yagenye abahinga batatu bakora amatohoza

Abatowe ngo bazogire ayo matohoza ku mabi yakozwe mu ntara ya Kasayi basabwa kuzokwerekana amabi yakozwe,kudoma ku bikorwa vyakozwe vyo kurengera agateka ka zina muntu muri yo ntara.

Inama y’umuryango mpuzamakungu ONU ijejwe agateka ka zinamuntu yasavye Reta ya Republika iharanira intwaro rusangi ya Kongo kuzokorana n’abo bahinga kuko bahejeje amatohoza yabo bazohanahana inkuru n’abajejwe intwaro aho muri Kongo aho abakoze ayo mabi bitegekanywa ko bazohanwa n’ubutungane bwa Kongo.

Kuva muri gitugutu umwaka wa 2016 ,inyuma y’igandagurwa ry’uwaserukira umuryango w’ubwoko bumwe bwaho muri Kasayi Kamwina Nsapu haciye haba ubwicanyi n’ibikorwa vyo guhohotera agateka ka zinamuntu mur’ako gace, aho ibiharuro bitangwa na Ekleziya Katorika yo muri Kongo vyerekana ko abantu bashika ibihumbi 3 bishwe abarenga umuriyoni nabo bata izabo.

Mu kwezi kwa ntwarante uyu mwaka wa 2017, abahinga babiri Michael Sharp ava muri Reta zunze Ubumwe za Amerika na Zaida Catalan bagandaguwe bariko bakora amatohoza ku binogo rusangi vyo mu ntara ya Kasai.