Uhuru Kenyatta na Raila Odinga biyemeje kunywanisha abakenya

Yanditswe na Callixte Carpe NDIKUMANA
Kuya 9 Ntwarante 2018 saa 03:31
17355
0 0

Amakuru atangwa n’ibiro vy’umukuru w’igihugu i Nairobi avuga ko umukuru w’igihugu Uhuru Kenyatta wa Kenya yagiranye umubonano na kizigenza w’imigambwe itavuga rumwe n’ubutegetsi, Raila Odinga. Muri uwo mu mubonano, abo banyepolitike bemeranije gutanguza umugambi wo kuraba ingene bokorana mu minsi iri mbere.

Kenyatta na Raila Odinga bumvikanye ko bagiye kuraba ingene bogarura abanyagihugu bakaja hamwe, Raila avuga ko igihe co gutorera inyishu ubudasa buri hagati yabo cageze.

Uwo mugambi ku ruhande rw’umukuru w’igihugu Kenyatta uzohagararirwa na Ambassadeur Martin Kimani, mu gihe umuhanuzi wa Odinga, Paul Mwangi azohagararira Odinga, ivyo bikavugwa mw’itangazo ryasohowe inyuma y’uwo mubonano.

Uwo mubonano ubaye hasigaye umwanya muto ngo umushikiranganji wa Amerika muvy’imigenderanire, Rex Tillerson ashike mu gihugu.

Ivyo bibaye kandi mu gihe igihugu ca Amerika camye gisaba ko hatunganywa ibiganiro vyotuma uruhagarara rwa politike rwadutse inyuma y’amatora yo mu mwaka uheze ko rworangira.

Umukuru w’igihugu Kenyatta yavuze ko bemeranije na Odinga ko igihugu ca Kenya gihambaye kurusha inyungu z’umuntu umwe, ko bikwiye ko izo ndongozi zumvikana.

Muri iryo tangazo bavuga ko mu vyumvikanyweko, abo baganiriye bahuriza kuri ibi : "Gushira hamwe abanyagihugu no kuvugana ingorane zugarije igihugu cacu, tukubaka igihugu gifise ubumwe kugira ntihabe umunyagihugu yumva ko akumiwe. Ino ni intango nshasha ku gihugu cacu. Turashobora kutabona ibintu kumwe, ariko tukaguma turi kumwe nk’abakenya."


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha