Zimbabwe : Emmerson Mnangagwa yarahiriye kurongora igihugu

Yanditswe na MUGISHA Van Naris
Kuya 24 novembre 2017 saa 11:24
21285
0 0

Emmerson Mnangagwa yahora ari icegera c’umukuru w’igihugu ca Zimbabwe yarahiriye kurongora igihugu kur’uyu wa gatanu igenekerezo rya 24 Munyonyo 2017, ku murwa mukuru Harare.

Emmerson Mnangagwa arahiriye amabanga y’umukuru w’igihugu ca Zimbabwe inyuma y’aho Robert Mugabe atangiye imihoho inyuma y’imyaka 37 ari ku butegetsi.

Amakuru dukesha imboneshakure ZBC TV yo mu gihugu ca Zimbabwe, Emmerson Mnangagwa yarahiriye ku kibuga National Sport Stadium of Zimbabwe kiri ku murwa mukuru Harare, inyuma y’iminsi yo kuva mu buhungiro mu gihugu ca Afrika y’Epfo.

Mw’ijambo yashikirije Emmerson Mnangagwa agiye kuramutswa Zimbabwe,yemeye ko azokwubahiriza ibwirizwa nshingiro no gukingira agateka k’abanyazimbabwe imiriyoni 16.

Ibirori vyo kwimika umukuru w’igihugu mushasha wa Zimbabwe vyari vyitabwe na Phillip Nyusi ,umukuru w’igihugu ca Mozambique hamwe na Nickey Iyambo icegera c’umukuru w’igihugu ca Namibiya.

Uwo yahoze ari icegera ca Robert Mugabe, yari yakuwe mu mabanga, ari naco catumye umugambwe uri ku butegetsi Zanu-PF hamwe n’igisirikare basaba Robert Mugabe gutanga imihoho.

Ku ruhande rw’abatavuga rumwe na Reta muri Zimbabwe, basaba Emmerson Mnangagwa agiye kurongora igihugu,kurandurana n’imizi umugenzo wo kurya igiturire wibonekeza muri ico gihugu ca Zimbabwe.

Bitegekanijwe ko Emmerson Mnangagwa atwara igihugu mu kiringo c’infatakibanza c’iminsi 90 , kugira hategurwe amatora.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha