Nigeria: Abantu batanu bapfuye bahitanywe n’igitero c’umwihevyi w’umwigeme

Umukobwa w’umwihevyi yishe abantu batanu mu gitero yagize mukibanza ingenzi zitegereramwo imiduga mu ntara iri muburaruko bushira ubuseruko, I Damaturu mu gihugu ca Nijeriya.

Amakuru ava mu gipolisi ca Nijeriya amenyesha ko ico gitero cabaye ku munsi wa kabiri igenekerezo rya 25 Myandagaro cakomerekeje abandi bantu bashika kuri 28.

Nta wuriyitira ico gitero, ariko mu bitero umugwi wa Boko Haram uheruka kugira muri ako karere, warakoresheje abigeme n’abakenyezi, bigatuma abantu bagira amakenga ko Boko Haram ishobora kuba ikoresha abantu yanyuruje.

Mu gitero Boko Haram yagize mu kigwati kiri mu buraruko bushira ubuseruko bwa Nijeriya mu mwaka uheze, Boko Haram yanyuruje abigeme bashika ku majana atatu, muri bo 200 bakaba bataramenyekana irengero ryabo.

Umugwi Boko Haram uramaze kwemera icese ko uzokurikiza amabwiriza y’umugwi w’intagondwa za Etat Islamique, umaze kugandagura abantu barenga ku bihumbi cumi mu mugambi w’ayo wo gushinga reta yo mu buraruko bwa Nijeriya igendera ku mategeko y’idini rya Islam.