Reta ya Tanzania yugaye radiyo zibiri zigenga

Reta ya Tanzania yafashe ingingo y’ukwugara vy’agateganyo radiyo zibiri zigenga zikekwako kubiba urwanko mu banyagihugu, zagirizwa kandi gutyoza umukuru w’igihugu w’ico gihugu, John Pombe Magufuli.

Izo radiyo zugawe ni Radio 5 ikorera mu gisagara ca Arusha, hamwe na Magic FM ikorera i Dar es salaam, zompi zikaba zari mu zikunzwe cane muri ico gihugu.

Umushikiranganji ajejwe itangazamakuru, Nape Nnauye, yategetse urwego rw’igihugu rugenzura itangazamakuru (Tanzania Communications Regulatory Authority, TCRA) kuzikorako iperereza, ndetse no kuzifatira ibihano bikwiye.

Umushikiranganji ajejwe itangazamakuru, Nape Nnauye

Yavuze ko izo radiyo zacishijemwo ibiganiro vyabangamiye umutekano w’abanyagihugu, hamwe n’imibereho yabo myiza.

Nta nsiguro zirambuye zatanzwe na Reta, ikivugwa gusa akaba ari uko ayo maradiyo yagirizwa ko yatanga ubutumwa butyoza umukuru w’igihugu John Magufuli.

Mu kwezi guheze, Reta ya Tanzania yafatiye iyo ngingo y’ukwugara, ku kinyamakuru citwa Mseto, cagirijwe ko canditse amakuru y’ibinyoma.

Reta y’ico gihugu yaheruka kandi kwaka uburenganzira bwo gukora, ku binyamakuru 473 vyiyandikishije, ariko bikaba vyari bimaze imyaka itatu yikurikiranya bidakora.