Cibitoke : Abitwaje ibirwanisho bishe umuntu umwe, bakomeretsa uwundi

Yanditswe na Egide NDUWIMANA
Kuya 23 Mukakaro 2017 saa 02:30
Yasomwe : 18144
0 0

Umudandaza wo muri komine Buganda, intara ya Cibitoke azwi kw’izina rya Asmani yategerewe n’umurwi w’abantu bitwaje inkoho mw’ijoro ryo kuri uwu wa gatandatu baramugandagura, n’imodoka yarimwo barayiturira. Uwunguruza iyo modoka yarakomeretse.

Mu giporisi c’Uburundi bamenyesha ko abo bantu bitwaje inkoho bagera kuri bane bari hafi y’uruzi Kagunuzi, muri zone Ndava, bakaba bari bahagaritse ipikipiki kugira basahure abari kuriyo. Babonye iyo modoka, nk’uko vyemezwa n’umuvugizi w’igiporisi c’Uburundi, baciye bareka iyo pikipiki.

Abo basuma bivye uwo mudandaza yishwe amafaranga ataramenyekana igitigiri, mu giporisi bakavuga ko amatohoza yatanguye.

Umuhungu yishe umuvyeyi wiwe

Umutekano warahungabanye kandi mw’ijoro ryo kuri uwu wa gatanu ku musozi RUBARAGAZA, zone Bwagiriza, komine Butezi, intara ya Ruyigi, ahagandaguriwe umupfakazi azwi kw’izina rya KARUNDI Thérèse w’imyaka irenga 60.

Mu giporisi bavuga ko uwo mupfasoni yishwe n’umuhungu wiwe azwi kw’izina rya NDAYIZEYE Jean Claude w’imyaka 24, akaba nawe nyene ubwiwe yiyemerera ko ariwe yamwishe amunize.

Uwakoze ico caha yagiriza umuvyeyi wiwe yishe ko atamufata nk’abandi bana biwe.

Mu giporisi bavuga ko NDAYIZEYE Jean Claude yagirizwa ico caha yoba afise uburwayi bwo mu mutwe, akaba ari mu minwe y’igiporisi.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha