Kibenga : Umuntu bivugwa ko ari umusuma yarashwe n’abaporisi

Umuntu umwe yishwe muri karitiye ya Kibenga bita rural, uwo yishwe akaba yahitanwe n’amasasu y’abaporisi. Mu giporisi c’Uburundi bavuga ko ari umusuma ari mu murwi w’abibisha imipanga mw’ijoro muri iyo karitiye.

Ayo masasu yarashwe n’abaporisi mu Kibenga, mu gihe bariko bakurikirana abo basuma batatu bitwaje imipanga, nk’uko vyashikirijwe na OP1 Pierre NKURIKIYE, umuvugizi w’igiporisi c’Uburundi.

Uwo avugira igiporisi yamenyesheje ko uwishwe azwi kw’izina rya Regis, yahora aba aho nyene mu Kigenga, akaba ariko yari yimukiye mu Kamenge.

"Yari mu baheruka kurekurwa ku kigongwe c’umukuru w’igihugu, akaba yari kumwe n’abandi basuma babiri baje kwiba n’imipanga. Bahora bategera abantu kugira babibe.", uko niko umuvugizi w’igiporisi yabishikirije.

Mu giporisi basaba abanyagihugu ko boza baratanga amakuru ku bajejwe umutekano kugira iyo mirwi y’abasuma ituzwe.