Pamoja Festival : Abaronse udushimwe hamwe n’ibitangenze neza

Yanditswe na Cherif NKESHIMANA
Kuya 31 Mukakaro 2017 saa 03:30
Yasomwe : 2700
0 0

Igiteramo ca Pamoja Festival caraye kibaye kuri uwu w’Imana, muri rusangi cagenze neza kiretse udukosa tumwe tumwe twabaye. Abitavye igiteramo barahimbawe, bamwe muribo barakira agakiza. Ubushimwe bwaratanze ku barushije abandi.

Hugues Safari ajejwe gutanga amakuru muri Pamoja Festival avuga ko bishimiye igikorwa caraye kibaye. Mu kiganiro yahaye ikinyamakuru IGIHE, Hugues amenyesha ko integuro za Pamoja Festival zatanguye mu kwezi kwa Ruhuhuma uno mwaka.

"Uko twabiteguye niko vyagenze, abaririmvyi canke imirwi yose twatumyeko baraje, haba abava mu makungu canke mu gihugu."

Uwo ajejwe gutanga amakuru arongera akavuga ko intumbero ya Pamoja Festival bayishitseko ijana kw’ijana.

"Abantu batari bake barakiriye agakiza, ico n’ikintu gikomeye ku batunganije ico giteramo."

Iyi ncuro ya kabiri ya Pamoja yari itandukanye cane n’iya mbere, Hugues abivuga afatiye ko uno mwaka ibihugu bitatu : Zambiya, Uganda na Kenya vyitavye ico giteramo.

Ikindi catandukanije iyi ncuro ya kabiri ni ya mbere, n’uko uno mwaka hatanzwe ubushimwe mu gisata ca Pamoja Festival Awards. Ubushimwe bwatanzwe uku gukurikira :

1. Umuririmvyi yarushije abandi mu bagabo (Best Male): Masezerano J Claude
2. Umuririmvyi wa mbere w’umukobwa (Best Female) : Nyenimana Samantha
3. Umurwi w’abatamvyi (Best Dance Group): Brights Nids Ministre
4. Umu Dj (Best Dj) : Dj Yvan
5. Umurwi w’abaririmvyi ( Best Singing Group): Best Friends of God.

Naho biri uko, hariho n’ibitagenze neza. Muri ivyo, Hugues Safari amenyesha ko igiteramo kitaheze nk’uko babishaka, kuko abarongoye ikarere igiteramo cabereye bategetse kwugara hasigaye umwanya kugira Pamoja Festival ihere. Ivyo vyanatumye hari abaririmvyi bataririmba. Ikindi kitagenze neza n’uko hari imodoka zibiri zibwe ama bateri. Kuri ivyo bitagenze neza, uwo ajejwe gutanga amakuru asaba imbabazi.

Mu kurangiza, Hugues ashimira amashirahamwe yafashije muri ico giteramo, nka BRARUDI ryatanze ikinyobwa ca Coca cola hamwe na Econet Burundi yafashije mu bushimwe bwatanzwe


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha