Bujumbura : Igitigiri c’abantu bahitanwe n’imvura y’isegenya kiguma ciyongera

Abanyagihugu bo mu gisagara ca Bujumbura bari mu kangaratete, inyuma y’imvura y’isegenya yaraye iguye ihitana amazu menshi n’abantu bitavye Imana, abandi benshi barakomereka, bakaba bariko bavurirwa ku bitaro bitandukanye vyo mu gisagara ca Bujumbura. Igitigiri c’ivyononekaye kiguma congerekana uko umwanya ugenda, abanyagihugu bagasaba abagira neza kubagarukirako.

N’aho ikirere ciriwe kimeze neza mu gisagara ca Bujumbura ku munsi w’ejo kuw’Imana, nk’igihe c’isaha zibiri z’ijoro, umuyaga mwinshi waratanguye, ukurikirwa n’imvura y’isegenya yahitanye amazu menshi muma komine cane cane aherereye mu buraruko bw’igisagara ca Bujumbura. Muri komine Cibitoke, Kamenge na Buterere, imiryango imenyesha ko yaraye yicaye, kuko yatewe n’amazi yinjiye mu mazu. Gushika mu gatondo ko kuri uwu wa mbere, iyo miryango yari ikigerageza gusohora ayo mazi. Bamwe mubagize iyo miryango ntibaratorwa irengero, abandi nabo bakaba batowe ibiziga mu turere batashobora kubamenya, aho twobabwira nk’ikiziga c’umwana catowe aho bita kuri "Main d’oeuvre", abanyagihugu babonye ico kiziga bakamenyesha ko batashoboye kumenya uwo mwana. Muri Komine Isare, abanyagihugu batandatu nibo bamaze kwitaba Imana, abagera kuri munani nabo bakaba batarakorwa irengero. Aho bita mu Gatunguru, abamaze kumenyekana bitavye Imana bagera kuri mirongo ine na batanu.

Inyuma y’ayo mazu menshi yabomotse, n’abantu bitavye Imana, iyo mvura y’isegenya yahungabanije uruja n’uruza, kuko amabarabara amwe amwe atariko arakora. Gushika mu gatondo ko kuri uwu wa mbere, ibarabara rikuru Bujumbura-Bugarama ntiririko rirakora kubera ryuzuyemwo ibibomoka vy’amazu n’ibiti vyatwawe n’iyo mvura. N’ibarabara rikuru muri komine Buterere mu gatondo ko kuri uwu wa mbere ntiryariko rirakora.

Igitigiri c’ivyononekaye n’abitavye Imana kibandanya congerekana, tukaba tuza kubigarukako mu makuru yo hanyuma. Mukurundira mwomenya ko ibitaro Roi Khaled vyarengewe n’igitigiri c’abakomeretse, bagasaba ko bobisahiriza mu kubironsa ayandi mazi.

Umukuru w’igihugu c’Uburundi Petero Nkurunziza, abicishije ku muhora wiwe ngurukanabumenyi wa facebook, yahojeje imiryango y’ababuze, amenyesha ko ahagaritse ibikorwa vyose yari afise kuri uwu munsi wa mbere, kugira akurikirane ubwiwe ico kibazo c’iyo mpanuka y’imvura y’isegenya yaraye isubiriye guhekura abarundi.