Ingabo za AMISOM zagaruje ibisagara 15 mu mezi cumi

Abasirikare barenga ibihumbi 22 barungitswe kugarukana amahoro mu gihugu ca Somaliya barashoboye kwigarurira ibisagara cumi na bitanu muvyari vyafashwe n’abarwanyi ba Al Shabab. Mu bikorwa vyihutirwa vy’ingabo za AMISOM zigizwe n’abarundi, abaganda, abanyakenya, abo muri Ethiopie, Djibouti na Sierra Leone, ni ukugarura ibisagara bitatu bikigenzurwa n’abo bihevyi ba Al Shabab.

Uwurongoye ingabo za AMISOM mu gihugu ca Somaliya, Lieutenant Général Silas Ntigurigwa, amenyesha ko mu mezi cumi aheze, ingabo arongoye zamaze kwaka abarwanyi ba Al Shabab ibisagara 15. Iyo ntwazangabo y’umurundi irongoye AMISOM imenyesha ko mu bisagara batse Al Shabab harimwo ivyafashwe n’abasirikare b’Abarundi baharurwa mu 5432 bari mu ngabo za AMISOM. Muri ivyo bisagara vyafashwe, harimwo intara ya Jalalaxi, isanzwe ivukamwo umukuru w’igihugu ca Somaliya, Hassan Cheikh Mohamed.

Ingabo z’abarundi ziri muri Somaliya

Lieutenant Général Silas Ntigurigwa akamenyesha ko bariko bakora ibishoboka vyose kugira bagarukane umutekano mu bisagara bitatu bikigenzurwa na Al Shabab. N’aho abo basirikare bakoze ibikorwa bishimishije, haravugwa ikibazo c’imishahara y’abarundi yoba iteba, aho usanga bamara amezi arenga atatu batarahembwa.

Mu kiganiro yahaye abamenyeshamakuru kuri uwu wa kane, Lieutenant Général Silas Ntigurigwa arongoye ingabo za AMISOM yamenyesheje ko ico kibazo bakizi, kandi ko atari ic’abarundi gusa, kuko gishikira abasirikare bose bari muri AMISOM. Lieutenant Général Silas Ntigurigwa araremesha izo ngabo, akavuga ko ishirahamwe ry’ubumwe bwa Afrika (Union Africaine) ryemeye ko mu kwezi kuza kwa Gitugutu, imishahara yose izoba yabonetse.

Lieutenant Général Silas Ntigurigwa arongoye ingabo za AMISOM