Kaminuza y’Uburundi : Ikigo c’i Kiriri casatswe n’igiporisi

Abanyeshure bo muri Kaminuza y’Uburundi mu kigo c’i Kiriri batewe amakenga n’igikorwa c’igiporisi cazindutse kirasaka muri ico kigo mu gatondo ko kuri uwu wa mbere. Mu giporisi bamenyesheje ko bariko barondera ababa muri ico kigo badakwije ivya ngombwa.

N’aho bamwe mu banyeshure bo muri ico kigo bamenyesheje ko ico gikorwa coba gihishije iyindi ntumbero, nta munyeshure n’umwe yafashwe, ico gikorwa kikaba cakozwe n’abaporisi baherekejwe n’abajejwe intwaro muri ico kigo c’i Kiriri.

Iryo sakwa ryabaye mu gihe abajejwe gucungera umutekano muri Kaminuza y’Uburundi, ikigo co ku Mutanga baheruka gufata ingingo z’ugukomeza umutekano muri ico kigo, inyuma y’aho abantu bitwaje ibirwanisho binjiriye kabiri kose muri ico kigo mw’ijoro, bakiba mu banyeshure amaterefone ngendanwa, mudasobwa (Ordinateurs), amafaranga hamwe n’ibindi.

Mu ngingo z’ugukomeza umutekano zafashwe, n’uko umuntu wese azoba akeneye kwinjira muri ico kigo azotegerezwa kuba yidondoye agatanga n’ibimuranga. Ku banyeshure nabo, imbere y’ukwinjira muri ico kigo bagasabwa kwerekana ikarata y’ishure ibaranga. Abakozi nabo bakorera aho muri ico kigo, mu kwinjira bagategerezwa kwerekana amakarata y’akazi abaranga (Badges).