Général Major Gaciyubwenge ahamagarira abasirikare gukora ataho bahengamiye

Umushikiranganji w’ukwivuna abansi, Général Major Ponsiyano Gaciyubwenge ahamagarira abasirikare gukora bisunze amategeko mu matora, akabasaba kwirinda agasotorano n’uguhengama.

Mu gihe hasigaye amezi abiri gusa kugira amatora abe mu Burundi, umushikiranganji wo kwivuna abansi Général Major Ponsiyano Gaciyubwenge yibukije ibintu bimwe bimwe bitegerezwa kuranga umusirikare wese.
Yibukije ko inzego z’umutekano zitegerezwa kwubahiriza aho abarundi bashize mu gushaka kubana mu mahoro, mu mutekano no mu butandukane bwabo.
Intwazangabo itegerezwa kwigisha abo irongoye kwama na ntaryo bisunga amategeko muvyo bakora vyose.
Yabibukije kandi ko inzego z’umutekano zitegerezwa gukorera abarundi bose, zikirinda ivyo vyose bishobora kubatwara mu migumuko, canke kubakwegera mu nyungu z’abanyeporitike aba na bariya, mu ntumbero yo gushika kuvyo bipfuza, abasaba gukorera bose ataho bahengamiye, kuko ivyo vyoza bicapfuza izo nzego za gisirikare.
Ariko rero, kubwa Général Major Ponsiyano Gaciyubwenge, kutagira aho uhengamiye ntibisigura ko udashobora gufata ingingo.

Ivyo umushikiranganji wo kwivuna abansi Général Major Ponsiyano Gaciyubwenge akaba yabishikirije kuri uno wa kabiri, mu kigo ISCAM, igihe iyo kaminuza yari iramutse yugurura icese umwaka w’ishure w’2014-2015.