Kinama : Iyarara ringana umusozi iruhande y’isoko

Amezi ane niyo arangiye isoko yo mu kinama idakurwa iyararara risigaye ringana n’umusozi.

Iryo yarara risanzwe rifise akamoto kabi, abahadandariza bakavuga ko bafise amakenga ku magara yabo, kuko indwara ziva kw’isuku rike no guhema nabi, zishobora kuzobafata. Umukuru w’iyo soko Christophe Ndorere, avuga ko igituma uwo musozi ungana uko w’iryo yarara, ari uko isoko itagira ikibanza kinini yoza irashiramwo imyanda iva mw’isoko, mu kurindira ko iza gutwarwa. Ahasanzwe rero hashirwa iryo yarara hakaba hari mu matati kugeza ubu, mu gihe Christophe Ndorere avuga ko uwahoze ari umukru w’igisagara ca Bujumbura Evrard Giswaswa yari yahahaye uwundi muntu.

Umukuru w’iyo soko avuga ko ishirahamwe SETEMU ariryo ryayora iyo myanda, none amezi ane akaba yigoroye, batahahonyoza ikirenge. Kubera iryo yarara ryinshi, yaba abandandariza muri iyo soko, canke abayirongoye bakavuga ko n’umunsi iyo soko yoterwa n’umuriro, bitokunda ko bayizimya, kubera iryo yarara. Basaba ubuyobozi bw’igisagara ca Bujumbura, gukora ibishoboka vyose kugira iyo soko igarukirwe, iryo yarara ritwarwe amazi atararenga inkombe.