Volley ball : Muzinga yaraye itsinze mu rukino rwa nyuma

Ishirahamwe ry’umupira w’amaboko “ Volleyball “ mu Burundi baratunganije kuva kuwa 13 Mukakaro gushika 14 Mukakaro 2013 ihiganwa ryo gutanguza inkino nyezina zo muri uyu mwaka. Igikombe c’iryo higanwa kikaba catahukanwe na Muzinga atsinze Rukinzo mu rukino rwa nyuma.

Muri iryo higanwa ryabereye ku kibuga co kuri Département des sports, abakunzi ba Volleyball bari baje ari benshi kurorera urwo rukino hagati y’iyo mirwi ibiri yo mu gisagara ca Bujumbura isanzwe ari abakeba.

Mu gice ca mbere, Muzinga yarasatiriye bikomeye umurwi wa Rukinzo, ari navyo vyatumye itsinda ico gice. Mu gice ca kabiri c’urukino, uruhigi rwarahindukiye, Rukinzo barivyukiranije ico gice kirangira ku ntsinzi yabo. Igice ca gatatu carangiye ku ntsinzi ya bagenzi ba Ntwari Tresor, kizigenza w’umurwi wa Muzinga ari nawe yatanze imipira myinshi kandi myiza yashoboye guha intsinzi umurwi w’igisirikare Muzinga, wirahira umurwi w’igipolisi Rukinzo.

Mu gice ca kane ari naco ca nyuma, Muzinga yatsinze bitagoranye, gutyo igikombe c’iryo higanwa baca baragitahira.

Twobamenyesha ko ico gice ca nyuma c’ihiganwa ryari rimaze iminsi ibiri caranzwe n’impari nyinshi ku mukinyi Jeef aturuka mu gihugu ca Uganda yahora akinira Muzinga. Uwo mukinyi yaguzwe na Rukinzo bakaba bariko bamenyesha ko ihiganwa ry’umupira w’amaboko « Volleyball » mu Burundi ritaremeza ivyerekeye uguhindura umurwi kw’uwo mukinyi. Inyuma y’impari, muri Muzinga baragondojwe baca barareka Jeff akinira Rukinzo muri urwo rukino.