Atera imigere ibiri : Umuporisi n’umuririmvyi

Umwuga ni ikintu ndengambibe kidashobora kwinyegeza, aho umuntu yoba ari hose atabujijwe n’itegeko ntakibuza ko akora ibiri mu kamere kiwe. Kuba umuririmvyi ntibisaba ko woba ukora akazi aka canke kariya, gikuru n’uko woba ufise iyo ngabirano.
N’aho bitamenyerewe cane mu Burundi, mu nzego z’igiporisi harimwo abaririmvyi karuhariwe, bamaze kugera ku rugero rw’abandi baririmvyi.

Kuba ari mu nzego z’umutekano nk’umuporisi ntibimubuza gukora n’umwuga wo kuririmba. OP1 Nkurikiye Pierre azwi kw’izina ry’ubuhizi N-Peter, mu kiganiro yagiranye n’ikinyamakuru IGIHE, amenyeshako kuva akiri mu mashure matomato yari mu mirwi y’abaririmvyi bo mw’isengero kandi yamye abikunda. Uko yagiye yigira imbere mu buzima bwiwe yaguma afise muri we agatimandirimbo.

Abarundi bati : « ibigori vyerera igihe ntivyerera inzara ». Abo ntibabeshe. Aha nyene yinjiye mu rwego rw’igiporisi, N-Peter yarasuraguye mu mategeko ngenderwako y’urwo rwego asanga ntarimubuza gukora umwuga wiwe wo kuririmba. Muri «Kirimba art Studio» niho yinjiye ubwa mbere, mu nzu ikora umuziki. Indirimbo yiwe ya mbere ayita munsi y’ijuru, aho yatanga ubutumwa ku butungane bw’Uburundi. Peter Nkurikiye yahavuye yinjira no kwa« Kim France Studio» aho yahakoreye amajwi y’ururirimbo «Ndi imborerwa Pe!» Aho yariko avuga cane cane ku muco w’Abarundi wo gukunda urukanywa. Urwo ruririmbo rwarakunzwe cane, maze abantu barutorera irindi zina «Amabwirizwa 10 y’imborerwa. »

Hari imigani ya kera abantu b’ubu batagikoresha, ubu imigere ibiri iratereka kandi yose igashika, Nkurikiye ntiyagumije aho, akazi k’igiporisi n’ukuririmba abikora vyose. Indirimbo ziwe ziramaze kuja mu mahiganwa, “«imyaka 50 irarangiye»” yatwaye ikibanza ca gatatu. Igihe igiporisi cariko gihamagarira Abarundi kwinjira muri urwo rwego, Pierre Nkurikiye, yahora ari icegera c’umuvugizi w’igiporisi c’Uburundi ati : "Reka nikore mu gahogo mfashe gutera akamo urwaruka kugira ruhurumbire urwo rwego”. Mu ruririmbo “ Cinjire” benshi baratahuye ko urwego rw’igiporisi rugenderwa.

Muti mbega none Nkurikiye aririmba mu mudiho uwa he? Amenyeshako imidiho yose ayishoboye, ariko bivana n’ubutumwa ashatse gutanga canke agakunda umudiho utanga isanamu y’igihugu ciwe. Ku bwiwe, abona ko umuziki w’Uburundi utaratora neza akaranga n’aho hari imirwi ndangakaranga n’abaririmvyi nka Steven Sogo bagerageza kugarukira akaranga, eka n’umurwi wa Lion Story asanzwe akunda cane urabikora neza.

Kubera afise indirimbo zirenga 150 zanditse, N-Peter avuga ko agiye kwiga uburyo bwo kwikorera indirimbo mu kuzishiramwo amajwi kuko amazu akora indirimbo azimvye.

Ku kibazo c’uko hari ibiteramo yoba aragirisha canke yoba yimirije kugirisha, yishuye neza ko naho atavyo aratangura kugirisha muri kazoza muzomubona ku ruhimbi «scene» ateramisha abantu.

Mu kurangiza, intwazangabo Nkurukiye Pierre (N-Peter) ahamagarira abaririmvyi kuja hamwe kugira batore umudiho w’i Burundi kandi, atera akamo abandi bari muri urwo rwego bafise muribo umwuga wo kuririmba ko batokwitinya, kuko ubutumwa buciye mu ndirimbo bushika kure.

Nkurikiye Pierre asanzwe ari n’umwanditsi, akaba n’umukinyi w’amareresi. Tuzobabwire ido ni do ry’ivyo yandika n’amareresi akina mu makuru yacu yo hanyuma.

Umviriza wongere wirabire ururirimbo «Cinjire» rwa OP1 Nkurukiye Pierre (N.Peter)