Bujumbura : Abakeneye amasanamu n’amakuru ya KOFFI OLOMIDE bariha mu madorare

Ku magenekerezo ya 30 Ruheshi n’uwa mbere Mukakaro, umuririmvyi Antoine Christophe Agbepa Mumba azwi kw’izina rya Koffi Olomide yakoreshe ibiteramo kuri Zion Beach na EFI Nyakabiga mu gisagara ca Bujumbura. Igiteramo ca mbere kwinjira yari amafaranga y’amarundi 100.000 mu bibanza bisanzwe hamwe n’ibihumbi amajana abiri mu bibanza vy’iteka. Kwinjira mu giteramo Koffi yakoreye muri EFI vyari ibihumbi 10.000 y’amarundi n’ibihumbi 20.000 mu bibanza vy’iteka.

Abamenyeshamakuru batashoboye gushika muri ivyo biteramo kandi bari bakeneye amakuru basabwe kuriha ayo mafaranga y’uwkinjira.

Inyuma y’ivyo biteramo, "Empire Media" yatumyeko Koffi OLOMIDE iriko irihisha amadore amajana abiri 200(200$) ku bamenyeshamakuru bakeneye amasanamu (Photos), amadorare amajana atatu (300$). Ku bakeneye "video" y’ibiteramo hamwe n’ikiganiro na Koffi, bariha amadorare ibihumbi bibiri (2000$). N’uwukeneye kuraba Le Grand Mopao Koffi Olomide arihishwa kuva ku madorare ibihumbi bitanu gushika ku bihumbi cumi (De 5000$ - 10.000$).

Mu gihe bitari bimenyerewe mu Burundi, bamwe mu bagize umurwi watumyeko Koffi Olomide bavuga ko ivyo biteramo vyateguwe mu ntumbero yo kudandaza, ari naco gituma uwo wese yari akeneye kumenya vyinshi kuri uwo muririmvyi ategerezwa kuriha amafaranga.

Uwo muririmvyi azoremesha ikindi giteramo kuri uwu wa gatatu kuri "ARENA" mu gisagara ca Bujumbura. Amafaranga y’uwkinjira ni ibihumbi mirongo indwi mu bibanza bisanzwe, hamwe n’ibihumbi ijana na mirongo ibiri mu bibanza vy’iteka.